TWEEJARIGE STERF TRAGIES

MEYERTON. - 'n Familie hier is in rou gedompel nadat hul tweejarige dogtertjie tragies sterf.

Skaars 'n paar uur na Willie en Nicole Maré saam met hul dogtertjie Anet en hul huishulp in Amanzimtoti in KwaZulu-Natal aangekom het, het die tragedie homself afgespeel. Die donkerkop dogtertjie het onverwags in die swembad geval by die vakansieverblyf wat die gesin bespreek het.

Sy is met hul aankoms by die hospitaal dood verklaar.

Familie en vriende van klein Anet is in rou gedompel oor haar skielike dood.

Anet se begrafnisdiens vind Saterdag by die Meyerton Katolieke Kerk om 11:00 v.m. plaas. Anet was die Maré-egpaar se enigste kind en hulle het Sondag, ‘n dag voor hul reis na Amanzimtoti, haar tweede verjaarsdagpartytjie gehou. Sy het op 4 Januarie twee geword.